ਝਾਰਖੰਡ ਦੇ ਇਕ ਪਰਿਵਾਰ ਨੇ ਬੁੱਧਵਾਰ ਨੂੰ ਦਾਅਵਾ ਕੀਤਾ ਕਿ ਉਨ੍ਹਾਂ ਨੂੰ ਪ੍ਰਯਾਗਰਾਜ ‘ਚ ਕੁੰਭ ਮੇਲੇ ‘ਚ ਉਨ੍ਹਾਂ ਦਾ ਇਕ ਗੁਆਚਿਆ ਹੋਇਆ ਰਿਸ਼ਤੇਦਾਰ ਮਿਲ ਗਿਆ ਹੈ ਅਤੇ ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਦੀ 27 ਸਾਲਾਂ ਤੋਂ ਚੱਲ ਰਹੀ ਤਲਾਸ਼ ਹੁਣ ਖਤਮ ਹੋ ਗਈ ਹੈ। ਗੁੰਮ ਹੋਏ ਰਿਸ਼ਤੇਦਾਰ ਗੰਗਾਸਾਗਰ ਯਾਦਵ ਹੁਣ 65 ਸਾਲ ਦੇ ਹੋ ਗਏ ਹਨ ਅਤੇ ‘ਅਘੋਰੀ ਸਾਧੂ’ ਬਣ ਗਏ ਹਨ ਅਤੇ ਹੁਣ ਉਨ੍ਹਾਂ ਦਾ ਨਾਂ ਬਾਬਾ ਰਾਜਕੁਮਾਰ ਹੈ। ਉਸ ਦੇ ਪਰਿਵਾਰ ਨੇ ਦੱਸਿਆ ਕਿ ਗੰਗਾਸਾਗਰ 1998 ਵਿੱਚ ਪਟਨਾ ਫੇਰੀ ਤੋਂ ਬਾਅਦ ਲਾਪਤਾ ਹੋ ਗਏ ਸਨ। ਉਨ੍ਹਾਂ ਦੀ ਪਤਨੀ ਧਨਵਾ ਦੇਵੀ ਨੇ ਆਪਣੇ ਦੋ ਪੁੱਤਰਾਂ ਕਮਲੇਸ਼ ਅਤੇ ਵਿਮਲੇਸ਼ ਨੂੰ ਇਕੱਲਿਆਂ ਹੀ ਪਾਲਿਆ।
ਗੰਗਾਸਾਗਰ ਦੇ ਛੋਟੇ ਭਰਾ ਮੁਰਲੀ ਯਾਦਵ ਨੇ ਕਿਹਾ, ”ਅਸੀਂ ਉਨ੍ਹਾਂ ਨੂੰ ਦੁਬਾਰਾ ਮਿਲਣ ਦੀ ਉਮੀਦ ਗੁਆ ਦਿੱਤੀ ਸੀ ਪਰ ਕੁੰਭ ਮੇਲੇ ‘ਤੇ ਗਏ ਸਾਡੇ ਇਕ ਰਿਸ਼ਤੇਦਾਰ ਨੇ ਗੰਗਾਸਾਗਰ ਵਰਗਾ ਦਿਖਣ ਵਾਲੇ ਵਿਅਕਤੀ ਦੀ ਤਸਵੀਰ ਖਿੱਚ ਕੇ ਸਾਨੂੰ ਭੇਜ ਦਿੱਤੀ। ਇਸ ਤੋਂ ਬਾਅਦ ਮੈਂ, ਧਨਵਾ ਦੇਵੀ ਅਤੇ ਉਸਦੇ ਦੋ ਪੁੱਤਰਾਂ ਨਾਲ ਕੁੰਭ ਮੇਲੇ ‘ਤੇ ਪਹੁੰਚਿਆ।”
ਮੇਲੇ ‘ਤੇ ਪਹੁੰਚ ਕੇ ਪਰਿਵਾਰ ਦਾ ਸਾਹਮਣਾ ਬਾਬਾ ਰਾਜਕੁਮਾਰ ਨਾਲ ਹੋਇਆ, ਪਰ ਉਨ੍ਹਾਂ ਨੇ ਆਪਣੀ ਪੁਰਾਣੀ ਪਛਾਣ ਗੰਗਾਸਾਗਰ ਯਾਦਵ ਵਜੋਂ ਮੰਨਣ ਤੋਂ ਇਨਕਾਰ ਕਰ ਦਿੱਤਾ। ਬਾਬਾ ਰਾਜਕੁਮਾਰ ਨੇ ਵਾਰਾਣਸੀ ਦਾ ਸਾਧੂ ਹੋਣ ਦਾ ਦਾਅਵਾ ਕੀਤਾ ਅਤੇ ਉਸ ਨੇ ਅਤੇ ਉਸ ਦੀ ਸਾਧਵੀ ਸਾਥੀ ਨੇ ਕਿਸੇ ਵੀ ਪੁਰਾਣੇ ਰਿਸ਼ਤੇ ਤੋਂ ਇਨਕਾਰ ਕੀਤਾ। ਹਾਲਾਂਕਿ, ਪਰਿਵਾਰ ਆਪਣੇ ਦਾਅਵੇ ‘ਤੇ ਅੜਿਆ ਰਿਹਾ ਕਿਉਂਕਿ ਬਾਬਾ ਰਾਜਕੁਮਾਰ ਪੂਰੀ ਤਰ੍ਹਾਂ ਗੰਗਾਸਾਗਰ ਯਾਦਵ ਨਾਲ ਮਿਲਦਾ-ਜੁਲਦਾ ਸੀ, ਇਸ ਲਈ ਉਸ ਦੇ ਮੱਥੇ ਅਤੇ ਗੋਡਿਆਂ ‘ਤੇ ਸੱਟ ਦੇ ਨਿਸ਼ਾਨ ਗੰਗਾਸਾਗਰ ਯਾਦਵ ਦੇ ਸਮਾਨ ਸਨ।
ਮੁਰਲੀ ਯਾਦਵ ਨੇ ਕਿਹਾ, “ਅਸੀਂ ਕੁੰਭ ਮੇਲੇ ਦੇ ਅੰਤ ਤੱਕ ਇੰਤਜ਼ਾਰ ਕਰਾਂਗੇ ਅਤੇ ਲੋੜ ਪੈਣ ‘ਤੇ ਡੀਐਨਏ ਟੈਸਟਿੰਗ ‘ਤੇ ਜ਼ੋਰ ਦੇਵਾਂਗੇ। ਜੇਕਰ ਟੈਸਟ ਦੇ ਨਤੀਜੇ ਮੇਲ ਨਹੀਂ ਖਾਂਦੇ ਤਾਂ ਅਸੀਂ ਬਾਬਾ ਰਾਜਕੁਮਾਰ ਤੋਂ ਮੁਆਫੀ ਮੰਗਾਂਗੇ।” ਇਸ ਦੌਰਾਨ ਪਰਿਵਾਰ ਦੇ ਕੁਝ ਮੈਂਬਰ ਘਰ ਪਰਤ ਆਏ ਹਨ ਜਦਕਿ ਬਾਕੀ ਅਜੇ ਵੀ ਮੇਲੇ ‘ਚ ਹਨ ਅਤੇ ਬਾਬਾ ਰਾਜਕੁਮਾਰ ਅਤੇ ਸਾਧਵੀ ‘ਤੇ ਨਜ਼ਰ ਰੱਖ ਰਹੇ ਹਨ।
