ਕਿਊਬੈਕ ਸਰਕਾਰ ਨੇ ਖਰੀਦਦਾਰੀ ਕਰਨ ਲਈ ਜਾਰੀ ਕੀਤੇ ਨਵੇਂ ਨਿਯਮ

ਡੋਨਲਡ ਟਰੰਪ ਦੇ ਟੈਰਿਫ ਖਤਰਿਆਂ ਦੇ ਮਦਦੇਨਜ਼ਰ, ਕਿਊਬੈਕ ਸਰਕਾਰ ਨੇ ਸਰਕਾਰੀ ਵਿਭਾਗਾਂ ਅਤੇ ਏਜੰਸੀਆਂ ਲਈ ਖਰੀਦਦਾਰੀ ਨਿਯਮਾਂ ਨੂੰ ਸਖ਼ਤ ਕਰ ਦਿੱਤਾ ਹੈ। ਇਸ ਦਾ ਮਕਸਦ ਸਰਕਾਰੀ ਕਰਮਚਾਰੀਆਂ ਨੂੰ ਸਥਾਨਕ ਚੀਜ਼ਾਂ ਖਰੀਦਣ ਲਈ ਉਤਸ਼ਾਹਿਤ ਕਰਨਾ ਅਤੇ ਆਨਲਾਈਨ ਪਲੇਟਫਾਰਮ ਜਿਵੇਂ ਕਿ ਅਮੇਜ਼ਨ ਤੋਂ ਖਰੀਦਦਾਰੀ ਕਰਨ ਤੋਂ ਬਚਣਾ ਹੈ।
ਨਵੇਂ ਨਿਯਮਾਂ ਅਨੁਸਾਰ, ਜੇ ਕੋਈ ਸਰਕਾਰੀ ਕਰਮਚਾਰੀ ਕਿਸੇ ਐਸੇ ਪਲੇਟਫਾਰਮ ਤੋਂ ਆਫਿਸ ਲਈ ਸਮਾਨ ਖਰੀਦਣਾ ਚਾਹੁੰਦਾ ਹੈ ਜਿਸਦਾ ਕਿਊਬੈਕ ਵਿੱਚ ਕੋਈ ਆਉਟਲੇਟ ਨਹੀਂ ਹੈ, ਤਾਂ ਉਸਨੂੰ ਆਪਣੇ ਮੈਨੇਜਰ ਤੋਂ ਮਨਜ਼ੂਰੀ ਲੈਣੀ ਪਵੇਗੀ। ਇਸ ਮਨਜ਼ੂਰੀ ਨੂੰ ਫਿਰ ਟ੍ਰੇਜ਼ਰੀ ਬੋਰਡ ਨੂੰ ਭੇਜਣਾ ਪਵੇਗਾ।
ਇਹ ਨਵਾਂ ਨਿਰਦੇਸ਼ 400 ਸੰਸਥਾਵਾਂ ਨੂੰ ਪ੍ਰਭਾਵਿਤ ਕਰੇਗਾ, ਜਿਸ ਵਿੱਚ “ਸਿਹਤ ਅਤੇ ਸਮਾਜਿਕ ਸੇਵਾਵਾਂ, ਸਿੱਖਿਆ ਅਤੇ ਉੱਚ ਸਿੱਖਿਆ ਨੈਟਵਰਕਸ” ਸ਼ਾਮਲ ਹਨ।
ਇਸ ਤੋਂ ਪਹਿਲਾਂ, 22 ਜਨਵਰੀ ਨੂੰ ਅਮੇਜ਼ਨ ਨੇ ਕਿਊਬੈਕ ਵਿੱਚ ਆਪਣੇ ਸੱਤ ਵੇਅਰਹਾਊਸ ਬੰਦ ਕਰਨ ਦਾ ਐਲਾਨ ਕੀਤਾ ਸੀ। ਇਸ ਨਾਲ ਕਿਊਬੈਕ ਵਿੱਚ 1,900 ਸਿੱਧੀਆਂ ਨੌਕਰੀਆਂ ਅਤੇ ਡਿਲੀਵਰੀ ਫਰਮਾਂ ਨਾਲ ਜੁੜੀਆਂ 2,600 ਨੌਕਰੀਆਂ ਖਤਮ ਹੋ ਗਈਆਂ ਸਨ।
ਕਿਊਬੈਕ ਸਰਕਾਰ ਨੇ ਇਹ ਵੀ ਕਿਹਾ ਕਿ ਇਹ ਨਵੇਂ ਨਿਯਮ ਉਨ੍ਹਾਂ ਕੰਪਨੀਆਂ ‘ਤੇ ਲਾਗੂ ਨਹੀਂ ਹੋਣਗੇ ਜੋ ਕਿਊਬੈਕ ਵਿੱਚ ਰਿਟੇਲ ਆਉਟਲੇਟ ਚਲਾਉਂਦੀਆਂ ਹਨ ਜਾਂ ਜਿਨ੍ਹਾਂ ਦਾ ਮੁੱਖ ਕਾਰੋਬਾਰ ਕਿਊਬੈਕ ਦੀਆਂ ਚੀਜ਼ਾਂ ਦੀ ਵਿਕਰੀ ਹੈ।