ਨਿਊਯਾਰਕ ਤੋਂ ਦਿੱਲੀ ਜਾਣ ਵਾਲੀ ਫਲਾਈਟ ਨੂੰ ਰੋਮ ਵਿੱਚ ਕਿਉਂ ਉਤਾਰਿਆ ਗਿਆ?

ਨਿਊਯਾਰਕ ਤੋਂ ਦਿੱਲੀ ਜਾ ਰਹੀ ਅਮਰੀਕਨ ਏਅਰਲਾਈਨਜ਼ ਦੀ ਫਲਾਈਟ 292 ਐਤਵਾਰ ਨੂੰ ਰੋਮ ਵਿੱਚ ਸੁਰੱਖਿਅਤ ਲੈਂਡ ਕਰ ਗਈ ਹੈ। ਇਹ ਫਲਾਈਟ ਇੱਕ ਸੁਰੱਖਿਆ ਮਾਮਲੇ ਕਾਰਨ ਰਸਤੇ ਵਿੱਚ ਹੀ ਰੋਮ ਵੱਲ ਮੋੜੀ ਗਈ ਸੀ। ਸੂਤਰ ਮੁਤਾਬਿਕ ਇੱਕ ਝੂਠੀ ਬੰਬ ਦੀ ਧਮਕੀ ਈਮੇਲ ਰਾਹੀਂ ਪ੍ਰਾਪਤ ਹੋਈ ਸੀ ਜਿਸ ਕਾਰਨ ਇਸ ਫਲਾਈਟ ਨੂੰ ਰੋਮ ਵੱਲ ਮੋੜਿਆ ਗਿਆ। ਏਅਰਲਾਈਨ ਨੇ ਦੱਸਿਆ ਕਿ ਫਲਾਈਟ ਦੀ ਇਟਲੀ ਦੇ ਲਿਓਨਾਰਡੋ ਡਾ ਵਿਂਚੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਕਾਨੂੰਨੀ ਐਜੰਸੀਜ਼ ਦੁਆਰਾ ਜਾਂਚ ਕੀਤੀ ਗਈ ਅਤੇ ਇਸਨੂੰ ਦਿੱਲੀ ਵੱਲ ਜਾਣ ਲਈ ਮਨਜ਼ੂਰੀ ਦਿੱਤੀ ਗਈ। ਹਾਲਾਂਕਿ, ਏਅਰਲਾਈਨ ਨੇ ਸੁਰੱਖਿਆ ਮਾਮਲੇ ਦੇ ਕਾਰਨ ਬਾਰੇ ਵਿਸਥਾਰ ਨਾਲ ਨਹੀਂ ਦੱਸਿਆ, ਪਰ ਕਿਹਾ ਕਿ ਦਿੱਲੀ ਵਿੱਚ ਲੈਂਡ ਕਰਨ ਤੋਂ ਪਹਿਲਾਂ ਜਾਂਚ ਜ਼ਰੂਰੀ ਸੀ।
ਫਲਾਈਟ ਵਿੱਚ ਸਵਾਰ ਯਾਤਰੀ ਨੀਰਜ ਚੋਪੜਾ ਨੇ ਦੱਸਿਆ ਕਿ ਕਪਤਾਨ ਨੇ ਐਲਾਨ ਕੀਤਾ ਸੀ ਕਿ ਦਿੱਲੀ ਵਿੱਚ ਲੈਂਡ ਕਰਨ ਤੋਂ ਤਿੰਨ ਘੰਟੇ ਪਹਿਲਾਂ ਫਲਾਈਟ ਨੂੰ “ਸੁਰੱਖਿਆ ਸਥਿਤੀ” ਵਿੱਚ ਬਦਲਾਅ ਕਾਰਨ ਮੋੜਿਆ ਗਿਆ ਹੈ। ਚੋਪੜਾ ਨੇ ਕਿਹਾ ਕਿ ਸ਼ੁਰੂ ਵਿੱਚ ਫਲਾਈਟ ਵਿੱਚ ਮਾਹੌਲ ਸ਼ਾਂਤ ਸੀ, ਪਰ ਜਦੋਂ ਕਪਤਾਨ ਨੇ ਐਲਾਨ ਕੀਤਾ ਕਿ ਫਾਈਟਰ ਜਹਾਜ਼ ਫਲਾਈਟ ਨੂੰ ਰੋਮ ਤੱਕ ਲੈ ਜਾਣਗੇ, ਤਾਂ ਉਨ੍ਹਾਂ ਨੂੰ ਚਿੰਤਾ ਹੋਣ ਲੱਗੀ।
ਇੱਕ ਹੋਰ ਯਾਤਰੀ ਜੋਨਾਥਨ ਬੇਕਨ ਨੇ ਦੱਸਿਆ ਕਿ ਫਲਾਈਟ ਦੌਰਾਨ ਇੰਟਰਨੈਟ ਕਨੈਕਸ਼ਨ ਨਹੀਂ ਸੀ, ਜਿਸ ਕਾਰਨ ਯਾਤਰੀਆਂ ਨੂੰ ਸਥਿਤੀ ਬਾਰੇ ਪਤਾ ਨਹੀਂ ਲੱਗ ਸਕਿਆ। ਲੈਂਡਿੰਗ ਤੋਂ ਬਾਅਦ, ਸਾਰੇ ਯਾਤਰੀਆਂ ਨੂੰ ਬੱਸਾਂ ਵਿੱਚ ਬਿਠਾ ਕੇ ਟਰਮੀਨਲ ਤੱਕ ਲਿਜਾਇਆ ਗਿਆ, ਜਿੱਥੇ ਹਰੇਕ ਯਾਤਰੀ ਅਤੇ ਉਨ੍ਹਾਂ ਦੇ ਸਮਾਨ ਦੀ ਸੁਰੱਖਿਆ ਲਈ ਜਾਂਚ ਕੀਤੀ ਗਈ। ਏਅਰਲਾਈਨ ਨੇ ਕਿਹਾ ਕਿ ਫਲਾਈਟ ਨੂੰ ਰੋਮ ਵਿੱਚ ਰਾਤ ਭਰ ਰੋਕਿਆ ਜਾਵੇਗਾ ਤਾਂ ਜੋ ਕਰੂ ਮੈਂਬਰਾਂ ਨੂੰ ਜ਼ਰੂਰੀ ਆਰਾਮ ਮਿਲ ਸਕੇ। ਫਲਾਈਟ ਨੂੰ ਜਲਦੀ ਹੀ ਦਿੱਲੀ ਵੱਲ ਭੇਜਿਆ ਜਾਵੇਗਾ। ਹਵਾਈ ਅੱਡੇ ਦੇ ਪ੍ਰਵਕਤਾ ਨੇ ਕਿਹਾ ਕਿ ਹਵਾਈ ਅੱਡੇ ਦੇ ਆਪਰੇਸ਼ਨਜ਼ ਸਾਧਾਰਣ ਰੂਪ ਵਿੱਚ ਜਾਰੀ ਹਨ।