ਹੁਣ ਇਸ ਉਡਾਣ ਨੇ ਵੀ ਮੁਫ਼ਤ ਕੈਰੀ-ਆਨ ਬੈਗੇਜ ਦੀ ਸਹੂਲਤ ਕੀਤੀ ਖਤਮ

ਮੋਂਟਰੀਆਲ ਸਥਿਤ ਏਅਰਲਾਈਨ ਏਅਰ ਟ੍ਰਾਂਸੈਟ ਨੇ ਆਪਣੇ ਸਸਤੇ ਟਿਕਟ ਵਿਕਲਪਾਂ ‘ਤੇ ਮੁਫ਼ਤ ਕੈਰੀ-ਆਨ ਬੈਗੇਜ ਦੀ ਸਹੂਲਤ ਖਤਮ ਕਰ ਦਿੱਤੀ ਹੈ। ਮੰਗਵਾਰ ਤੋਂ, ਏਅਰਲਾਈਨ ਨੇ ਕਿਹਾ ਹੈ ਕਿ ਈਕੋ ਬਜਟ ਫੇਅਰ ਪੈਕੇਜ ਦੀ ਵਰਤੋਂ ਕਰਨ ਵਾਲੇ ਗਾਹਕਾਂ ਨੂੰ ਸਿਰਫ਼ ਇੱਕ ਹੈਂਡਬੈਗ ਜਾਂ ਛੋਟਾ ਬੈਕਪੈਕ, ਲੈ ਕੇ ਜਾਣ ਦੀ ਇਜਾਜ਼ਤ ਹੋਵੇਗੀ। ਕੋਈ ਵੀ ਹੋਰ ਸਮਾਨ ਸਟੈਂਡਰਡ ਫੀਸ ਦੇ ਅਨੁਸਾਰ ਚੈਕ ਕੀਤਾ ਜਾਵੇਗਾ।
ਈਕੋ ਸਟੈਂਡਰਡ ਫੇਅਰ ਵਾਲੇ ਗਾਹਕਾਂ ਨੂੰ ਹੁਣ ਸਿਰਫ਼ ਇੱਕ ਕੈਰੀ-ਆਨ ਬੈਗ ਅਤੇ ਇੱਕ ਨਿੱਜੀ ਸਮਾਨ ਲੈ ਜਾਣ ਦੀ ਇਜਾਜ਼ਤ ਹੋਵੇਗੀ। ਏਅਰਲਾਈਨ ਨੇ ਦੱਸਿਆ ਕਿ ਇਹ ਤਬਦੀਲੀਆਂ ਦੱਖਣ, ਅਮਰੀਕਾ ਅਤੇ ਕੈਨੇਡਾ ਦੀਆਂ ਅੰਦਰੂਨੀ ਫਲਾਈਟਾਂ ‘ਤੇ ਲਾਗੂ ਹੋਣਗੀਆਂ। ਯੂਰੋਪ, ਮੋਰੱਕੋ ਅਤੇ ਪੇਰੂ ਦੀਆਂ ਫਲਾਈਟਾਂ, ਅਤੇ ਟ੍ਰਾਂਸੈਟ ਦੇ ਆਲ-ਇਨਕਲੂਸਿਵ ਪੈਕੇਜਾਂ ‘ਤੇ ਇਹ ਤਬਦੀਲੀਆਂ ਲਾਗੂ ਨਹੀਂ ਹੋਣਗੀਆਂ।
ਪਿਛਲੇ ਸਾਲ, ਏਅਰ ਕੈਨੇਡਾ ਅਤੇ ਵੈਸਟਜੇਟ ਨੇ ਵੀ ਇਸੇ ਤਰ੍ਹਾਂ ਦੇ ਕਦਮ ਚੁੱਕੇ ਸਨ। ਮਈ ਵਿੱਚ, ਵੈਸਟਜੇਟ ਦੇ ਸੀਈਓ ਨੇ ਇੱਕ ਨਵੀਂ ਸਸਤੀ ਫੇਅਰ ਕੈਟੇਗਰੀ ਪੇਸ਼ ਕੀਤੀ ਸੀ, ਜੋ ਕਿ ਯਾਤਰੀਆਂ ਨੂੰ ਕੈਰੀ-ਆਨ ਬੈਗ ਤੋਂ ਬਿਨਾਂ ਉਡਾਣ ਭਰਨ ਦੀ ਇਜਾਜ਼ਤ ਦਿੰਦੀ ਹੈ। ਸਸਤੇ ਫੇਅਰ ਵਾਲੇ ਯਾਤਰੀਆਂ ਨੂੰ ਓਵਰਹੈੱਡ ਬਿਨਜ਼ ਵਿੱਚ ਬੈਗ ਰੱਖਣ ਦੀ ਇਜਾਜ਼ਤ ਨਹੀਂ ਹੈ, ਹਾਲਾਂਕਿ ਉਨ੍ਹਾਂ ਨੂੰ ਆਪਣੀ ਸੀਟ ਦੇ ਹੇਠਾਂ ਇੱਕ ਬੈਕਪੈਕ, ਪਰਸ ਜਾਂ ਕੋਈ ਵੀ ਛੋਟਾ-ਮੋਟਾ ਨਿੱਜੀ ਸਮਾਨ ਰੱਖਣ ਦੀ ਇਜਾਜ਼ਤ ਹੈ।
ਏਅਰ ਕੈਨੇਡਾ ਨੇ ਦਸੰਬਰ ਵਿੱਚ ਐਲਾਨ ਕੀਤਾ ਸੀ ਕਿ 3 ਜਨਵਰੀ, 2025 ਤੋਂ ਬਾਅਦ ਇਕਨਾਮੀ ਬੇਸਿਕ ਫੇਅਰ ਬੁੱਕ ਕਰਨ ਵਾਲੇ ਯਾਤਰੀਆਂ ਨੂੰ ਕੈਨੇਡਾ, ਅਮਰੀਕਾ, ਮੈਕਸੀਕੋ, ਕੈਰੀਬੀਅਨ ਅਤੇ ਮੱਧ ਅਮਰੀਕਾ ਦੀਆਂ ਫਲਾਈਟਾਂ ‘ਤੇ ਸਿਰਫ਼ ਇੱਕੋ ਹੀ ਨਿੱਜੀ ਸਮਾਨ ਲੈ ਜਾਣ ਦੀ ਇਜਾਜ਼ਤ ਹੋਵੇਗੀ। ਹਾਲਾਂਕਿ, ਅੰਤਰਰਾਸ਼ਟਰੀ ਫਲਾਈਟਾਂ ‘ਤੇ ਜਾਣ ਵਾਲੇ ਯਾਤਰੀਆਂ ਨੂੰ ਕੈਰੀ-ਆਨ ਬੈਗ ਲੈ ਜਾਣ ਦੀ ਇਜਾਜ਼ਤ ਹੈ।
ਇਨ੍ਹਾਂ ਤਬਦੀਲੀਆਂ ਕਾਰਨ ਪਿਛਲੇ ਮਹੀਨੇ ਏਅਰ ਕੈਨੇਡਾ ਅਤੇ ਵੈਸਟਜੇਟ ਦੇ ਕਾਰਜਕਾਰੀਆਂ ਨੂੰ ਓਟਾਵਾ ਵਿੱਚ ਸੰਸਦ ਮੈਂਬਰਾਂ ਦੇ ਸਵਾਲਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਸਰਕਾਰ ਯਾਤਰਾ ਨੂੰ ਵਧੇਰੇ ਕਿਫਾਇਤੀ ਬਣਾਉਣਾ ਚਾਹੁੰਦੀ ਹੈ, ਤਾਂ ਉਸਨੂੰ ਕੈਨੇਡਾ ਦੇ ਹਵਾਈ ਸਫਰ ਸਿਸਟਮ ਵਿੱਚ ਸੁਧਾਰ ਕਰਨ ਦੀ ਲੋੜ ਹੈ।