ਯੂਕਰੇਨ ਦੇ ਫੌਜੀ ਕਮਾਂਡਰ ਓਲੇਕਸੈਂਡਰ ਸਿਰਸਕੀ ਨੇ ਰਿਪੋਰਟ ਦਿੱਤੀ ਹੈ ਕਿ ਕਰਸਕ ਖੇਤਰ ਵਿੱਚ ਇੱਕ ਹਫ਼ਤਾ ਪਹਿਲਾਂ ਸ਼ੁਰੂ ਕੀਤੇ ਗਏ ਇੱਕ ਮਹੱਤਵਪੂਰਨ ਸਰਹੱਦ ਪਾਰ ਹਮਲੇ ਤੋਂ ਬਾਅਦ ਯੂਕਰੇਨੀ ਬਲਾਂ ਨੇ ਹੁਣ 1,000 ਵਰਗ ਕਿਲੋਮੀਟਰ ਰੂਸੀ ਖੇਤਰ ਨੂੰ ਕੰਟਰੋਲ ਕਰ ਲਿਆ ਹੈ। ਇਹ ਹੈਰਾਨੀਜਨਕ ਹਮਲਾ ਰੂਸੀ ਖੇਤਰ ਵਿੱਚ 30 ਕਿਲੋਮੀਟਰ ਤੱਕ ਵਧਿਆ ਹੈ, ਜਿਸ ਨਾਲ ਪ੍ਰਭਾਵਿਤ ਖੇਤਰਾਂ ਤੋਂ ਲਗਭਗ 121,000 ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ। ਜਿਸ ਬਾਰੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਰੂਸ, ਜਿਸ ਨੇ ਪਹਿਲਾਂ ਸੰਘਰਸ਼ ਨੂੰ ਹੋਰ ਦੇਸ਼ਾਂ ਤੱਕ ਵਧਾ ਦਿੱਤਾ ਸੀ, ਹੁਣ ਆਪਣੀ ਧਰਤੀ ‘ਤੇ ਇਸ ਦੇ ਨਤੀਜੇ ਭੁਗਤ ਰਿਹਾ ਹੈ। ਉਥੇ ਹੀ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਇਸ ਹਮਲੇ ਨੂੰ “ਵੱਡੀ ਭੜਕਾਹਟ” ਕਰਾਰ ਦਿੱਤਾ ਹੈ ਅਤੇ ਰੂਸੀ ਸੈਨਿਕਾਂ ਨੂੰ ਯੂਕਰੇਨੀ ਬਲਾਂ ਨੂੰ ਬਾਹਰ ਕੱਢਣ ਦਾ ਨਿਰਦੇਸ਼ ਦਿੱਤਾ ਹੈ। ਇਸ ਸਥਿਤੀ ਕਾਰਨ 28 ਪਿੰਡ ਯੂਕਰੇਨ ਦੇ ਕੰਟਰੋਲ ਹੇਠ ਆ ਗਏ ਹਨ ਅਤੇ 12 ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ। ਸੰਘਰਸ਼ ਨੇ ਯੂਕਰੇਨੀ ਨਾਗਰਿਕਾਂ ਅਤੇ ਬੁਨਿਆਦੀ ਢਾਂਚੇ ‘ਤੇ ਰੂਸੀ ਜਵਾਬੀ ਹਮਲਿਆਂ ਦੇ ਡਰ ਨੂੰ ਵਧਾਇਆ ਹੈ। ਰਿਪੋਰਟ ਮੁਤਾਬਕ ਯੂਕਰੇਨੀ ਓਪਰੇਸ਼ਨ ਦਾ ਉਦੇਸ਼ ਵੱਧ ਤੋਂ ਵੱਧ ਵਿਘਨ ਪੈਦਾ ਕਰਨਾ ਅਤੇ ਰੂਸ ਵਿੱਚ ਸਥਿਤੀ ਨੂੰ ਅਸਥਿਰ ਕਰਨਾ ਹੈ, ਜਿਸ ਦੀ ਕੋਸ਼ਿਸ਼ ਵਿੱਚ ਹਜ਼ਾਰਾਂ ਯੂਕਰੇਨੀ ਸੈਨਿਕ ਲੱਗੇ ਹੋਏ ਹਨ।
ਯੂਕਰੇਨ ਨੇ ਰੂਸੀ ਖੇਤਰ ਦੇ 1,000 ਵਰਗ ਕਿਲੋਮੀਟਰ ਦੇ ਕੰਟਰੋਲ ਦਾ ਕੀਤਾ ਦਾਅਵਾ।
