ਮਾਰੀਸ਼ਸ ਦੇ ਪ੍ਰਧਾਨ ਮੰਤਰੀ ਪ੍ਰਵਿੰਦ ਜੁਗਨਾਥ ਨੇ ਬ੍ਰਿਟੇਨ ਤੋਂ ਚਾਗੋਸ ਟਾਪੂ ਹਾਸਲ ਕਰਨ ਤੋਂ ਬਾਅਦ ਭਾਰਤ ਸਰਕਾਰ ਅਤੇ ਪ੍ਰਧਾਨ ਮੰਤਰੀ ਮੋਦੀ ਦਾ ਧੰਨਵਾਦ ਕੀਤਾ ਹੈ। ਉਨ੍ਹਾਂ ਨੇ ਸ਼ੁੱਕਰਵਾਰ ਨੂੰ ਸੋਸ਼ਲ ਮੀਡੀਆ ‘ਤੇ ਲਿਖਿਆ ਕਿ ਬਸਤੀਵਾਦ ਦੇ ਖਿਲਾਫ ਲੜਾਈ ‘ਚ ਸਾਰੇ ਸਾਥੀ ਦੇਸ਼ਾਂ ਨੇ ਉਨ੍ਹਾਂ ਦਾ ਸਾਥ ਦਿੱਤਾ ਹੈ।
ਮੀਡੀਆ ਰਿਪੋਰਟਾਂ ਮੁਤਾਬਕ ਬ੍ਰਿਟੇਨ ਅਤੇ ਮਾਰੀਸ਼ਸ ਵਿਚਾਲੇ ਚਾਗੋਸ ਟਾਪੂ ਨੂੰ ਲੈ ਕੇ ਲਗਭਗ 50 ਸਾਲਾਂ ਤੋਂ ਵਿਵਾਦ ਚੱਲ ਰਿਹਾ ਸੀ। ਭਾਰਤ ਲੰਬੇ ਸਮੇਂ ਤੋਂ ਦੋਹਾਂ ਵਿਚਾਲੇ ਇਸ ਸਮਝੌਤੇ ‘ਤੇ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਸਮਝੌਤੇ ਤੋਂ ਬਾਅਦ ਭਾਰਤ ਨੇ ਦੋਵਾਂ ਧਿਰਾਂ ਦਾ ਸਵਾਗਤ ਕੀਤਾ ਹੈ।
ਬ੍ਰਿਟੇਨ ਅਤੇ ਮਾਰੀਸ਼ਸ ਨੇ ਵੀਰਵਾਰ ਨੂੰ 60 ਟਾਪੂਆਂ ਵਾਲੇ ਚਾਗੋਸ ਟਾਪੂਆਂ ਦੇ ਸਬੰਧ ਵਿੱਚ ਇੱਕ ਸਮਝੌਤੇ ‘ਤੇ ਹਸਤਾਖਰ ਕੀਤੇ। ਇਸ ਮੁਤਾਬਕ ‘ਚਾਗੋਸ ਆਈਲੈਂਡ’ ਮਾਰੀਸ਼ਸ ਨੂੰ ਦਿੱਤਾ ਜਾਵੇਗਾ।
ਚਾਗੋਸ ਟਾਪੂ ਉੱਤੇ ਡਿਏਗੋ ਗਾਰਸੀਆ ਟਾਪੂ ਵੀ ਹੈ। ਅਮਰੀਕਾ ਅਤੇ ਬ੍ਰਿਟੇਨ ਨੇ ਇੱਥੇ ਸਾਂਝਾ ਫੌਜੀ ਅੱਡਾ ਸਥਾਪਿਤ ਕੀਤਾ ਹੈ। ਸਮਝੌਤੇ ਮੁਤਾਬਕ ਅਮਰੀਕਾ-ਬ੍ਰਿਟੇਨ ਦਾ ਬੇਸ ਇੱਥੇ 99 ਸਾਲਾਂ ਤੱਕ ਰਹੇਗਾ।
