ਬੈਂਗਲੁਰੂ ਦੇ ਕੋਰਾਮੰਗਲਾ ਵਿੱਚ ਇੱਕ ਪੀਜੀ ਹੋਸਟਲ ਵਿੱਚ ਇੱਕ ਦਿਲ ਦਹਿਲਾ ਦੇਣ ਵਾਲਾ ਹਾਦਸਾ ਵਾਪਰਿਆ। ਜਿਸ ਦਾ ਇੱਕ ਡਰਾਉਣਾ ਵੀਡੀਓ ਸਾਹਮਣੇ ਆਇਆ ਹੈ। 3 ਦਿਨ ਪਹਿਲਾਂ ਬੁੱਧਵਾਰ ਨੂੰ 24 ਸਾਲਾ ਔਰਤ ਕ੍ਰਿਤੀ ਕੁਮਾਰੀ ਦਾ ਉਸ ਦੇ ਪੀਜੀ ਸਥਿਤ ਘਰ ‘ਚ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ ਸੀ। ਹੁਣ ਸੀਸੀਟੀਵੀ ਫੁਟੇਜ ਜਾਰੀ ਕੀਤੀ ਗਈ ਹੈ, ਜਿਸ ਵਿੱਚ ਘਟਨਾ ਬਾਰੇ ਹੋਰ ਜਾਣਕਾਰੀ ਮਿਲਦੀ ਹੈ।
ਕੁਮਾਰੀ ਮੂਲ ਰੂਪ ਤੋਂ ਬਿਹਾਰ ਦੀ ਰਹਿਣ ਵਾਲੀ ਹੈ ਅਤੇ ਬੇਂਗਲੁਰੂ ਵਿੱਚ ਇੱਕ ਪ੍ਰਾਈਵੇਟ ਕੰਪਨੀ ਵਿੱਚ ਕੰਮ ਕਰਦੀ ਸੀ। ਇਹ ਹਮਲਾ ਮੰਗਲਵਾਰ ਰਾਤ 11.10 ਤੋਂ 11.30 ਵਜੇ ਦੇ ਵਿਚਕਾਰ ਕੋਰਮੰਗਲਾ ਵੀਆਰ ਲੇਆਉਟ ਪੀਜੀ ਵਿਖੇ ਹੋਇਆ। ਪੁਲਿਸ ਦਾ ਮੰਨਣਾ ਹੈ ਕਿ ਹਮਲਾਵਰ, ਚਾਕੂ ਨਾਲ ਲੈਸ, ਰਾਤ 11.10 ਵਜੇ ਦੇ ਕਰੀਬ ਇਮਾਰਤ ਵਿੱਚ ਦਾਖਲ ਹੋਇਆ। ਇਹ ਕਤਲ ਤੀਜੀ ਮੰਜ਼ਿਲ ‘ਤੇ ਇਕ ਕਮਰੇ ਦੇ ਕੋਲ ਹੋਇਆ, ਜਿੱਥੇ ਕੁਮਾਰੀ ਦੀ ਗਰਦਨ ‘ਤੇ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਪੁਲਸ ਨੇ ਖੁਲਾਸਾ ਕੀਤਾ ਕਿ ਲੜਕੀ ਦਾ ਕਤਲ ਕਰਨ ਵਾਲਾ ਦੋਸ਼ੀ ਉਸ ਦੇ ਦੋਸਤ ਦਾ ਬੁਆਏਫ੍ਰੈਂਡ ਹੈ।
ਕੋਰਾਮੰਗਲਾ ਪੁਲਿਸ ਅਤੇ ਦੱਖਣ ਪੂਰਬੀ ਡਵੀਜ਼ਨ ਦੀ ਡੀਸੀਪੀ ਸਾਰਾ ਫਾਤਿਮਾ ਨੇ ਤੁਰੰਤ ਘਟਨਾ ਵਾਲੀ ਥਾਂ ਦਾ ਦੌਰਾ ਕੀਤਾ। ਅਧਿਕਾਰੀ ਫਿਲਹਾਲ ਸੀਸੀਟੀਵੀ ਫੁਟੇਜ ਦੀ ਵਰਤੋਂ ਕਰਕੇ ਸ਼ੱਕੀ ਵਿਅਕਤੀ ਦਾ ਪਤਾ ਲਗਾ ਰਹੇ ਹਨ, ਜਿਸ ਨੂੰ ਇੱਕ ਜਾਣਕਾਰ ਮੰਨਿਆ ਜਾ ਰਿਹਾ ਹੈ। ਕੋਰਮੰਗਲਾ ਥਾਣੇ ਵਿੱਚ ਕੇਸ ਦਰਜ ਕੀਤਾ ਗਿਆ ਹੈ। ਫਿਲਹਾਲ ਕਾਤਲ ਅਜੇ ਤੱਕ ਫੜੇ ਨਹੀਂ ਗਏ ਹਨ।
ਸ਼ੁਰੂਆਤੀ ਜਾਂਚ ਮੁਤਾਬਕ ਕਾਤਲ ਮੱਧ ਪ੍ਰਦੇਸ਼ ਦਾ ਰਹਿਣ ਵਾਲਾ ਹੈ। ਇਸੇ ਲਈ ਉਸ ਦੀ ਭਾਲ ਲਈ ਪੁਲਿਸ ਦੀ ਟੀਮ ਮੱਧ ਪ੍ਰਦੇਸ਼ ਵੀ ਭੇਜੀ ਗਈ ਹੈ। ਵੀਡੀਓ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਇਕ ਵਿਅਕਤੀ ਪਾਲੀਥੀਨ ਬੈਗ ਫੜੀ ‘ਪੇਇੰਗ ਗੈਸਟ’ ਦੇ ਕਮਰੇ ‘ਚ ਦਾਖਲ ਹੁੰਦਾ ਹੈ। ਉਹ ਦਰਵਾਜ਼ਾ ਖੜਕਾਉਂਦਾ ਹੈ। ਕੁਝ ਦੇਰ ਬਾਅਦ ਉਹ ਲੜਕੀ ਨੂੰ ਘਸੀਟਦਾ ਹੋਇਆ ਦਿਖਾਈ ਦਿੰਦਾ ਹੈ। ਇਸ ਦੌਰਾਨ ਪੀੜਤਾ ਨੇ ਹਮਲੇ ਦਾ ਵਿਰੋਧ ਕੀਤਾ ਪਰ ਕਾਤਲ ਉਸ ਦਾ ਗਲਾ ਵੱਢ ਕੇ ਉਥੋਂ ਭੱਜ ਗਿਆ। ਰੌਲਾ ਸੁਣ ਕੇ ਇਮਾਰਤ ‘ਚ ਮੌਜੂਦ ਹੋਰ ਲੜਕੀਆਂ ਵੀ ਮੌਕੇ ‘ਤੇ ਪਹੁੰਚ ਗਈਆਂ ਪਰ ਉਸ ਨੂੰ ਬਚਾ ਨਹੀਂ ਸਕੀਆਂ। ਚਾਕੂ ਦੇ ਕਈ ਵਾਰ ਕੀਤੇ ਜਾਣ ਤੋਂ ਬਾਅਦ ਖੂਨ ਨਾਲ ਲੱਥਪੱਥ ਕ੍ਰਿਤੀ ਕੁਮਾਰੀ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ।
