ਜਲੰਧਰ ਦੇ ਸਭ ਤੋਂ ਪੌਸ਼ ਇਲਾਕੇ ਮਾਡਲ ਟਾਊਨ ਸਥਿਤ ਨਿਊ ਫਿਟਨੈੱਸ ਜਿਮ ਦੇ ਬਾਹਰ ਸੋਮਵਾਰ ਦੇਰ ਸ਼ਾਮ ਸ਼ਹਿਰ ਦੇ ਵੱਡੇ ਕਾਰੋਬਾਰੀ ਵਿਕਾਸ ਚੋਪੜਾ ਦੇ ਬੇਟੇ ‘ਤੇ ਕਰੀਬ 6 ਨੌਜਵਾਨਾਂ ਨੇ ਹਮਲਾ ਕਰ ਕੇ ਜ਼ਖਮੀ ਕਰ ਦਿੱਤਾ। ਹਮਲਾਵਰ ਇੱਥੇ ਹੀ ਨਹੀਂ ਰੁਕੇ, ਉਨ੍ਹਾਂ ਨੇ ਕਾਰੋਬਾਰੀ ਦੇ ਬੇਟੇ ਨੂੰ ਕਾਰ ਵਿੱਚ ਅਗਵਾ ਕਰ ਲਿਆ ਅਤੇ ਸ਼ਕਤੀ ਨਗਰ ਨੇੜੇ ਸੁੱਟ ਦਿੱਤਾ। ਘਟਨਾ ਤੋਂ ਬਾਅਦ ਥਾਣਾ ਮਾਡਲ ਟਾਊਨ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਇਸ ਤੋਂ ਬਾਅਦ ਪੁਲਸ ‘ਚ ਬਿਆਨ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਕੁੱਟਮਾਰ ਦੀ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਪੁਲਿਸ ਜਾਂਚ ‘ਚ ਦੂਜੀ ਧਿਰ ਨੇ ਇੱਕ ਹੋਰ ਵੀਡੀਓ ਪੇਸ਼ ਕੀਤੀ ਹੈ ਜੋ ਉਸੇ ਦਿਨ ਦੀ ਹੈ। ਜਿਸ ਵਿੱਚ ਸਕੂਲ ਦਾ ਵਿਦਿਆਰਥੀ ਦਕਸ਼ ਖੰਨਾ ਆਪਣੇ ਦੋਸਤਾਂ ਨਾਲ ਮਨਿਸਟਰੀ ਆਫ ਡ੍ਰੀਮਜ਼ ਰੈਸਟੋਰੈਂਟ ਪਹੁੰਚਿਆ ਸੀ। ਜਿੱਥੇ ਕਾਰੋਬਾਰੀ ਵਿਕਾਸ ਚੋਪੜਾ ਦੇ ਭਤੀਜੇ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਉਸ ਦੀ ਕੁੱਟਮਾਰ ਕੀਤੀ ਸੀ। ਕਾਰੋਬਾਰੀ ਦੇ ਭਤੀਜੇ ਨੇ ਲੜਾਈ ਤੋਂ ਬਾਅਦ ਵੀਡੀਓ ਵੀ ਬਣਾਈ ਸੀ। ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਵਿਕਾਸ ਚੋਪੜਾ ਦਾ ਬੇਟਾ ਅਤੇ ਭਤੀਜਾ ਅਕਸਰ ਇਕੱਠੇ ਰਹਿੰਦੇ ਸਨ। ਭਤੀਜੇ ਦਾ ਪਤਾ ਨਾ ਲੱਗਣ ‘ਤੇ ਹਮਲਾਵਰਾਂ ਨੇ ਵਪਾਰੀ ਦੇ ਲੜਕੇ ਦੀ ਕੁੱਟਮਾਰ ਕੀਤੀ ਅਤੇ ਚਚੇਰੇ ਭਰਾ ਦਾ ਹਾਲ-ਚਾਲ ਪੁੱਛਣ ਲਈ ਕਾਰ ‘ਚ ਬਿਠਾ ਕੇ ਲੈ ਗਏ | ਦੋਵਾਂ ਧਿਰਾਂ ਦੀ ਸ਼ਿਕਾਇਤ ਤੋਂ ਬਾਅਦ ਪੁਲਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ, ਫਿਲਹਾਲ ਸੀਸੀਟੀਵੀ ਫੁਟੇਜ ‘ਚ ਹਮਲਾਵਰਾਂ ਦੀ ਪਛਾਣ ਕਰ ਲਈ ਗਈ ਹੈ ਅਤੇ ਜਲਦ ਹੀ ਉਨ੍ਹਾਂ ਨੂੰ ਗ੍ਰਿਫਤਾਰ ਕਰ ਲਿਆ ਜਾਵੇਗਾ। ਥਾਣਾ ਮਾਡਲ ਟਾਊਨ ਦੇ ਇੰਚਾਰਜ ਨੇ ਦੱਸਿਆ ਕਿ ਦੋਵਾਂ ਧਿਰਾਂ ਦੀਆਂ ਸ਼ਿਕਾਇਤਾਂ ਲੈ ਕੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜਲਦੀ ਹੀ ਕਾਰਵਾਈ ਕੀਤੀ ਜਾਵੇਗੀ।
